من روائع الزجال عبدالرحمان فهمي حول القنيطرة

من طرف **LIMO Noureddine** الثلاثاء فبراير 04, 2014 12:37 am

من روائع الزجال عبدالرحمان فهمي حول القنيطرة

ورقة تعريف
الزجال عبدالرحمان فهمي ابن سبو وابن حلالة والملقب بشاعر حلالة في روائعه الزجلية حول المدينة ابن ديور المخزن مجموعة 12 فاعل جمعوي مند السبعينات اغنية الطفل ومارس مسرح الاطفال من مؤسسي جمعية براعم السلام بالقنيطرة التي كانت رائدة في دلك الوقت ومثل المدينة في القناة الصغيرة ببرامج الاطفال وكان كاتب الكلمات للاغاني وغيرها وبعد دلك اسس جمعية جسور للادب والفنون

القصيدة الاولى
غِيوَانِية حَلَّالــــــــــــــــــــــــــــــــــــــــــــــــــــــــــــــــــــــــــــــــة
ما بِينْ لَوْرودْ طَلعَـتْ حَلَّالــــة
زِينَتْ لَمْدونْ و سَالو الجَوَّالـة
سَالو حَانُونْ وَ كْتُوبْ الرَحَّالة
عْلَى رْبِيعْ السْهُولْ وجَهْدْ الرَجَّالة
و شْريطْ سْبُـو و الغَابة الضَلاَّلة
السيبْري و البَلُّوطْ و النَّبْتَة الحَنظالَة
بْحَيْرَة بوغَابة الجَنَّة الهَــبَّالـــة
و الطْيُورْ الهَاجْرة عْلِيها نَزَّالـــــة
والقَصبَة المَهْدية مَرْصَدْ اللْوَالَة
أَول عَصْيَــــان كنْتي لِيهْ قْبَالَة
فْأَيَّامْ الفِدَا و زْعَامْة العَقَّالَــــة
هاجُو الفَلَّاحَ هَاجو العَمَّالَة
شِيبْ و عْزَارَة و الثَوْرَة الطَوَّالة
و فْكُلْ دْوَاوَرْ هَاجو الخيَّالة
رَعْبو لَعْدُو و رَدُّوه مَدْلَالَة
وَشْحَالْ مَنْ شْهِيدْ فدَاكْ يا لَغْزالة
وَ التَّارِيخْ شاهَدْ و رْفُوفُو سَجَّالة
و دْيُور صَنْياكْ شْهُود المقْتالة

لَكِنْ أَ قْنِيطْرَة أشْ هَاد الحَالْة
ضَاعْ مَا بْنِيتي اليُومْ و تْسَالَة
كُنْتٍي جَنَّة و صْبَحْتِ زَبَّالْــة
طْوَابرْ الحَمَّاق و جحَافَل البُهَالة
و فَحْضوررْجَالك رْمُوزْ المَهْزَالة
قَتْلو ضْمِيرهُمْ و حَطُّوكْ فَدْلَالة
حْرِيرَكْ بَاعوه و لَبْسوكْ دَرْبَالة
و شْعِيرْ لَحْقُول رَدُّوه نَخَّالة
و خِيرْ لَبْحُورْ ادَّاوه الجَمَّالة
وَ عْرِيسَك تَهْمُوهْ أُوُ زَوْجُوكْ مَنْ والة
و عْدُولْ زْواجَكْ من الذْيابْ الضَالَّة
و صْدَاقَكْ مْصِيدة بْحَالْ النْبَالَة
وَ شْهُودَكْ دُخَالة
و عْرُوضَك جُهَالَة
ما شَمُّو وْرود مَا سَكْنُو فَنْوَالَة
دَاخْلِينْ عْليك بْحَال شِي عَالة
و فْلِيلة الدَخْلَة هَلْلُو الهَلَّالة
ما صْبَحْتِ عْرُوسة ما صْبَحْتِ هَجَّالة
ضَاعْ ليِكْ العَزْ و كَثْرو السَوَّالة
و جَرْحَكْ كْبَرْ و هَجْراتو لَمْقَالة
و شْحَالْ من شَاهَدْ فْ عَيْنُو جْلالة
مَا عَرْفَكْ تَغْيِيرْ ما دَزْتِي مرْحَلة
هَجراتَكْ لَحْضَانْ وَ ضْحيتِ مَسْأَلة
و تْلَحو عْليكْ اليَدِّين الَمحْتَالَة
نَهْبو الزَبْدَة و طلْعُو الحُتَالة

و مَهْما هَمْلُوكْ
أنت للهَمْ حَمَّالة
أنت شَهدْ لَوْطانْ
أنت فَالخَدْ خَالة
أنت التَّاج و السُلْطَان
أنتِ فالسْما هَالة
و إِلَا كَانْ الصَمْتْ رِضَى
فَ صَمْتَكْ لَا لَا و
حتَّى لِين يا قْنِيطْرَة تْعَدِّي بالنْعَالَة
عبد الرحمان فهمي

القصيدة الثانية
حلالــــــــــــــــــــــــــــــــــــــــــــــــــــــــــــــــــــــــــــــــة
حًلًّالًة ما تْنُوضْ فًمْحًابًقْ
وًلًا تْزًيًنْ رْحًابْ لًقْصُـــــورًة
حًلًّالًة الوًرْدْ الصًّـــــادًقْ
عْلًى جْنًابْ الزْرًايًبْ مًنْشُورًة
بًذْرًتْها مًا جْلًبْهًا سًــارًقْ
وًلًا قْطًعْ بٍيهًا لًبْحُـــــــــــورًة
حًلًّالًة زْمًنْهًا سًــــــاحًقْ
وًمْعً كُلْ رْبٍيع تْجٍي مًبْشُورًة
تْجي و تْجِيب الخيرْ الدافَقْ
عْلَ السْهولْ شَهْد و عْطُورَة
و يْجيها كُل ْ صبي قَالَـقْ
يْسالها عْلَ حْظُوظو المَقْدورَة
واشْ نَاجَح أَوْ لَ خَافقْ
يَبْتـر فيــها وهـيَّ مَحْبـــورَة
...ــــــــــــــــــــ يتبع
عبد الرحمان فهمي

القصيدة الثالتة
سْبـــــــــــــو ( زجل )

سْبو يا سْبو
يا ذاك الواد القَاعَرْ
يا وْرِيدْ بلادي
بْلحْياةْ سايِرْ
يا مرَضَّعْ لَبْحَر
بحْليبْ الجْبَال
و مْخَضَّرْ البَر
مْرُوجْ و دْغال
يا ذاك الواد القَاعَرْ
مالْ ماكْ يَوْصَلنا عاكَرْ
و ضْفافْ البَرْ
أنْتَ بيها مْحَاصَرْ
إِمْتا تْنُوضْ ثايَرْ
و تَرْوي البَر البَايَرْ
تْشَعْشَعْ نَعْناعو
تْسَنْبل قَمْحو
و تْبَنْ تخَلٌيهْ نْوادَرْ
يا ذاك الواد القَاعَرْ
ما نْتَ حَامَلْ
ما نْتَ عاقَر
ما سْقِيتي وْرُودْ
ما مْحيتي حْدودْ
ماتْليتي تْجُودْ
عْلينا بْشَابَل
________.... يتبع
عبد الرحمان فهمي